Blaksamband Íslands

Brauðmolar

Forsíða » 37. Öldungamót BLÍ, Fjallabyggð og Dalvík - Trölli 2012

37. Öldungamót BLÍ, Fjallabyggð og Dalvík - Trölli 2012

Kæru blak - öldungar, - öðlingar og ljúflingar Íslands.

Fyrir hönd bæjarfélaganna (Dalvíkur- og Fjallabyggðar) og blakklúbbanna á Tröllaskaga (Hyrnunnar, Súlunnar og Rimanna) boða ég til 37.Öldungamóts Blaksambands Íslands (BLÍ) sem haldið verður á Tröllaskaga (Siglufirði, Ólafsfirði og Dalvík) dagana 28.-30.apríl 2012. Spilað verður á 9 völlum:

3 völlum í íþróttamiðstöð hvers bæjarkjarna þar sem sundlaug og þreksalur er í sömu byggingu.

Mótið hefur hlotið nafnið Trölli 2012.

Heimasíða mótsins er komin í gang en þar munu allar fréttir og upplýsingar varðandi mótið koma inn jafnt og þétt. Slóðin á heimasíðuna er:

www.trolli2012.is

Hægt er að senda blaköldungi tölvupóst ef það eru einhverjar spurningar varðandi mótið en hann er með netfangið: oldungur@blak.is Gisting verður í boði fyrir keppendur í Grunnskóla Fjallabyggðar á Siglufirði. Ef keppnislið eða keppendur vantar upplýsingar um gistinguna í grunnskólanum eða gistimöguleika almennt þá er hægt að senda tölvupóst á eftirfarandi netfang: lindagylfa@simnet.is

Skráning á mótið verður á www.blak.is og verður opnað fyrir skráningu 01.mars 2012 og henni mun síðan ljúka 28.mars 2012.

Mótsgjaldið er 34.000.- pr þátttökulið en það er 2.000.- lækkun frá síðasta móti. Ástæða lækkunarinnar er m.a. sú að bæjarfélögin munu bjóða keppendum í sund alla þrjá keppnisdagana.

Lokahófið mun fara fram mánudagskvöldið 30.apríl og verður það í íþróttamiðstöðinni á Siglufirði. Forsala miða mun hefjast um miðjan 15. febrúar 2012 og ljúka 4. apríl. Verð á lokahófið er 6.500.- í forsölu.

Seldir verða 700 miðar á lokahófið svo það er um að gera að næla sér í miða sem fyrst.

Mótið er opið öllum sem uppfylla 2.grein fyrsta kafla reglugerðar um Öldungamót BLÍ sem hljóðar svo:

Þátttaka í Öldungamóti BLÍ er heimil öllum félögum og hópum, sem uppfylla eftirfarandi skilyrði:

a) Vera skráður iðkandi í blaki hjá félagi innan ÍSÍ.

b) Vera á keppnisárinu 30 ára eða eldri í öldungadeildum, 40 ára eða eldri í öðlingadeildum og 50 ára eða eldri í ljúflingadeildum.

c) Hver leikmaður leiki aðeins í einni deild og með einu liði. Öldungur getur gefið félagi leyfi til að færa liðsmann á milli deilda ef meiðsli koma upp í liði. Það gildir þó aðeins innan sama félags og aldrei úr efri deildum í neðri deildir.

d) Félagaskipti þarf ekki að tilkynna.

Skráning á mótið verður á blak.is og verður opnað fyrir skráningu mjög fljótlega.

Öldungur er með netfangið oldungur@blak.is

Með kærri blakkveðju,

Óskar Þórðarson

Öldungur 2012