Mikasa deild kvenna: Þróttur Nes í annað sætið
Gestirnir byrjuðu leikinn mun betur og unnu fyrstu tvær hrinurnar 13-25 og 12-25. Þriðja hrinan var jöfn og spennandi allan tímann. Heimastúlkur náðu að vinna upp forskot gestanna í byrjun hrinunnar og komust í tæknihlé 8-7 eftir að hafa verið undir 3-7. Sama var upp á teningnum í framhaldinu og jafnt var á flestum tölum þar til í lokin að Þróttur Reykjavík komst í 24-21. Náðu gestirnir að klóra í bakkann upp í 23 stig en lengra komust þær ekki og hrinan varð heimastúlkna, 25-23.
Gestirnir voru lítt hrifnir af því að tapa hrinunni og komu tvíefldar til leiks. Jafnt var þó á flestum tölum þar til í lokin er Þróttur Nes náði nokkrum sterkum uppgjöfum í gólf og kláruðu hrinuna 17-25 og þar með leikinn 1-3.
Stigahæstu leikmenn voru Miglena Apostolova með 18 stig og Helena Kristín Gunnarsdóttir með 16 stig fyrir Þrótt Nes. Í liði Þróttar Reykjavík var Fjóla Rut Svavarsdóttir stigahæst með 9 stig og Hildigunnur Magnúsdóttir með 7 stig.
Þróttur Nes komst upp fyrir Fylki í annað sæti deildarinnar með sigrinum og á liðið því ennþá möguleika á deildarmeistaratitlinum. Á morgun leikur Þróttur Nes við topplið HK í deildinni og því um mikilvægan leik að ræða fyrir bæði lið. Leikurinn hefst kl. 14.00 í Digranesi. Tveir aðrir leikir verða á morgun í deildinni en Fylkir heimsækir KA til Akureyrar og Stjarnan sækir Ými heim. Á Akureyri hefst leikur kl. 15.30 og í Digranesi er það Ýmir-Stjarnan kl. 17.00.
Þá verður slagur HK og Stjörnunnar einnig á morgun í Mikasadeild karla en HK getur jafnað KA að stigum sigri liðið á morgun í sínum síðasta leik í deildinni. Stjarnan á tölfræðilega möguleika á að ná silfrinu og því er að miklu að keppa fyrir þá einnig. Leikurinn er í Digranesi kl. 15.30 eða eftir toppslaginn hjá konunum.
