Bikarmót 2 á Akureyri
Almennt - fimmtudagur 9.feb.12 13:33 - Lestrar 159
Síðari undankeppni í Bikarkeppni BLÍ er haldin um helgina á Akureyri. Alls mæta 11 lið norður í keppnina, 5 í karlaflokki og 6 í kvennaflokki en barist verður um tvö sæti í undanúrslitum í hvorum flokki.
Búist er við mikilli spennu í kvennaflokki um helgina. Þau lið sem eftir eru í mótinu eru sex talsins: HK, Þróttur R, Stjarnan, Ýmir, KA og Eik. Síðastnefnda félagið er mótshaldari um helgina og er til alls líklegt á heimavelli. HK er sigurstranglegast af liðunum hér en liðið er taplaust í deildinni. Öll liðin í keppninni eru verðug í undanúrslitin í bikarnum og verður gaman að fylgjast með keppninni um helgina. Fyrstu leiki í kvennaflokki verða á morgun föstudag kl. 19.00 og leikjum verður lokið seinnipart laugardags.
Í karlaflokki eru 5 lið: Stjarnan, KA, Fylkir, Þróttur N og UMFG. Fyrirfram eru Stjarnan og KA sigurstranglegust í keppninni en á góðum degi gætu hin liðin átt möguleika einnig. Fylkismenn hafa átt gott tímabil í 2. deild karla sem og Þróttur Nes fyrir austan. Fyrstu leikir í karlaflokki verða kl. 20.15 á morgun föstudag.
Bikarmót 2 fer fram í Íþróttahöllinni á Akureyri. Aðstaðan er til fyrirmyndar í Höllinni en þarna spilaði blaklið KA á árum áður, þ.e. fram til ca. 1992 þegar KA heimilið var tekið í notkun. Eikin sér um mótshaldið að þessu sinni.
Undanúrslit og úrslit í Bikarkeppni BLÍ fara fram í Laugardalshöllinni 17. og 18. mars nk. Liðin sem eru komin nú þegar í undanúrslit eru HK og Þróttur R í karlaflokki og Afturelding og Þróttur Nes í kvennaflokki. Þessi lið spila ekki saman í undanúrslitum en dregið verður í bikarnum í næstu viku.
