Afreksbúðirnar gengu vel
Afreksbúðirnar fóru fram að Varmá í Mosfellsbæ og voru allt í allt fjórar æfingar, laugardag og sunnudag. Alls voru 6 þjálfarar að störfum mest allan tímann en Magnús Aðalsteinsson hafði yfirumsjón með búðunum.
Skipulagning búðanna var í höndum yngriflokkanefndar BLÍ og framkvæmdin tókst vel. Jason Ívarsson, formaður BLÍ leit við á sunnudeginum og lýsti yfir ánægju sinni með framtak nefndarinnar en heildarsvipurinn var glæsilegur. Æfingar voru á 6 völlum í einu þar sem einn þjálfari var með hvern völl og hóparnir skiptu um velli á hálftíma fresti. Þátttakendur fengu einnig fræðslu um næringarfræði og markmiðasetningu í fyrirlestraformi og voru í hádegismat frá Saffran í hádeginu, báða dagana.
Allir þátttakendur búðanna fengu merktan hleðslubol frá MS sem setti sinn svip á búðirnar. U17 ára þjálfararnir voru þjálfarar í búðunum og skoðuðu krakkana og nokkrum þátttakendum búðanna hefur verið bætt í U17 ára forval.
Á lokaæfingunni var stillt upp 10 liðum og haldið blandað mót. Að búðunum loknum mátti sjá ungmennin þreytt en ánægð og virðist sem afreksbúðir sem þessar séu komnar til að vera.
